ಇಂಡಿಯಾ ಮೈತ್ರಿಕೂಟ ತನ್ನ ವೋಟ್ ಬ್ಯಾಂಕ್ ಗಾಗಿ ‘ಮುಜ್ರಾ’ ಮಾಡುತ್ತಿದೆ:ಪ್ರಧಾನಿ ಮೋದಿ

ನವದೆಹಲಿ: ಮುಸ್ಲಿಂ ವೋಟ್ ಬ್ಯಾಂಕ್ ಗಾಗಿ ಐಎನ್ ಡಿಐಎ ಬಣ ಮುಜ್ರಾ ನಡೆಸುತ್ತಿದೆ ಎಂದು ಪ್ರಧಾನಿ ನರೇಂದ್ರ ಮೋದಿ ಶನಿವಾರ ಆರೋಪಿಸಿದ್ದಾರೆ.

ಉತ್ತರ ಪ್ರದೇಶದ ಗಾಜಿಪುರದಲ್ಲಿ ನಡೆದ ರ್ಯಾಲಿಯಲ್ಲಿ ಮಾತನಾಡಿದ ಮೋದಿ, ಬಡವರು, ರೈತರು, ಕಾರ್ಮಿಕರು ಮತ್ತು ದಲಿತರನ್ನು ನಿರ್ಲಕ್ಷಿಸಿ ವಂಶಪಾರಂಪರ್ಯ ಪಕ್ಷಗಳು ಅರಮನೆಗಳನ್ನು ನಿರ್ಮಿಸಿವೆ ಎಂದು ಆರೋಪಿಸಿದರು. ಐ.ಎನ್.ಡಿ.ಐ.ಎ. ಬಣವು ಅಧಿಕಾರಕ್ಕೆ ಬಂದರೆ ಮುಸ್ಲಿಮರಿಗೆ ಅನುಕೂಲವಾಗುವಂತೆ ಸಂವಿಧಾನವನ್ನು ಬದಲಾಯಿಸುತ್ತದೆ ಎಂದು ಅವರು ಎಚ್ಚರಿಸಿದರು.

ಇದಕ್ಕೂ ಮುನ್ನ ಬಿಹಾರದ ಬಕ್ಸಾರ್, ಕರಕಾಟ್ ಮತ್ತು ಪಾಟಲಿಪುತ್ರದಲ್ಲಿ ನಡೆದ ರ್ಯಾಲಿಗಳಲ್ಲಿ ಮೋದಿ ಅವರು ಐಎನ್ಡಿಐಎ ಬಣವು ದಲಿತರು ಮತ್ತು ಹಿಂದುಳಿದ ವರ್ಗಗಳ ಮೀಸಲಾತಿಯಿಂದ ವಂಚಿತರಾಗದಂತೆ ತಡೆಯುವುದಾಗಿ ಪ್ರತಿಜ್ಞೆ ಮಾಡಿದ್ದರು. ಪ್ರತಿಪಕ್ಷಗಳು ಭಯಭೀತರಾಗಿವೆ ಎಂದು ಅವರು ಆರೋಪಿಸಿದರು ಮತ್ತು ಭಯೋತ್ಪಾದನೆ ಮತ್ತು ಭ್ರಷ್ಟಾಚಾರದ ವಿರುದ್ಧ ಹೋರಾಡುವ ತಮ್ಮ ಬದ್ಧತೆಯನ್ನು ಒತ್ತಿ ಹೇಳಿದರು.

“ಬಿಹಾರ ಯಾವಾಗಲೂ ಸಾಮಾಜಿಕ ನ್ಯಾಯವನ್ನು ಎತ್ತಿಹಿಡಿದಿದೆ. ಪರಿಶಿಷ್ಟ ಜಾತಿ, ಪರಿಶಿಷ್ಟ ಪಂಗಡ ಮತ್ತು ಒಬಿಸಿಗಳ ಹಕ್ಕುಗಳನ್ನು ಕಸಿದುಕೊಳ್ಳದಂತೆ ಐ.ಎನ್.ಡಿ.ಐ.ಎ. ಬಣವನ್ನು ನಾನು ತಡೆಯುತ್ತೇನೆ. ಅವರು ಗುಲಾಮರಾಗಿ ಉಳಿಯಬಹುದು ಮತ್ತು ತಮ್ಮ ಮತ ಬ್ಯಾಂಕ್ ಅನ್ನು ಮೆಚ್ಚಿಸಲು ಮುಜ್ರಾ ಮಾಡಬಹುದು” ಎಂದು ಮೋದಿ ಹೇಳಿದರು.